L’ANGOLO DELLA POESIA di Giovanni Moschella – SETTEMBRE

Settembre

Nazario Bruno

Vulesse nu settembre doce doce,
ca se purtasse chesta estate, chiano,
e mme tenesse n’atu ppoco ’a mano,
e mme rialasse ll’uva e, ddoppo, ’a noce.

Settembre nzieme ’a n’atu ppoco ’e sole,
si pure cu na luce cchiù smurzata,
mo ca se regne ’e fronne chesta strata
spannenno addore ’e vino e ’e pummarole.

Mo c’ ’a staggione bbella se nn’è gghiuta
primma d’ ’o Vierno, ce ha dda sta’ ll’Autunno!
na vota accussì jeva chistu munno,
mo pure ’sta speranza s’è pperduta!

Ajere ’o sole … e ogge chiarfo e ggelo,
all’intrasatta, senza avertimento,
nuvule scure, lampe, e acqua e vviento,
e se nne cade tutto quanto ’o cielo!

’Stu munno ca s’è ffatto assaje feroce
’o canzo nun t’ ’o dà, no, va fujenno!
Sperammo ca si uno va murenno,
tenesse ’armeno ’o tiempo ’e se fa’ ’a Croce!

Print Friendly, PDF & Email

Lascia un commento

Il tuo indirizzo email non sarà pubblicato.